પોષક તત્વોથી ભરપૂર છે મીઠો લીમડોઃ વાળની અનેક સમસ્યાઓ કરે છે દૂર, આ રીતે કરો ઉપયોગ

અમદાવાદ, તા. 22 માર્ચ 2023, બુધવાર

વાળની ​​સારી વૃદ્ધિ માટે જરૂરી છે કે તેને પૂરતું પોષણ મળે. મીઠા લીમડામાં એવા અનેક પોષક તત્વો હોય છે જે વાળ માટે ખૂબ જ ફાયદાકારક હોય છે. તેમાં વિટામિન C, એન્ટીઑકિસડન્ટ, વિટામિન B, પ્રોટીન વગેરે પર્યાપ્ત માત્રામાં મળી આવે છે. તે સરળતાથી વાળના સેલ્યુલર પુનર્જીવનમાં મદદ કરે છે અને માથાની ચામડીના રક્ત પરિભ્રમણને સુધારે છે જેનાથી તેને સ્વસ્થ રાખવામાં મદદ મળે છે. તેનાથી વાળનો સંપૂર્ણ વિકાસ થાય છે અને વાળની વૃદ્ધિ માટે પણ તે ખૂબ જ ફાયદાકારક હોય છે. તો ચાલો જાણીએ કે તમે વાળને હેલ્ધી રાખવા અને ગ્રોથ વધારવા માટે તેનો કેવી રીતે ઉપયોગ કરી શકો છો.

હેર ટોનિકઃ- વાળને મજબૂત બનાવવા માટે તમે એક પેનમાં 3થી 4 ચમચી નારિયેલનું તેલ નાખો અને તેમાં એક મુઠ્ઠી મીઠો લીમડો ઉમેરો. તેને ત્યાં સુધી ગરમ કરો જ્યાં સુધી મીઠા લીમડાના પત્તા કાળા ન થઈ જાય. હવે ગેસ બંધ કરો અને આ મિશ્રણને ઠંડુ થવા દો. હવે તેને મેશ કરીને અને વાળમાં મૂળમાં લગાવી દો. હવે 1 કલાક પછી વાળને શેમ્પૂથી ધોઈ લો. વધુ સારા રિઝલ્ટ માટે તમે જોજોબા ઓઈલનો ઉપયોગ કરો. 

હેર માસ્કઃ- એકથી બે ચમચી દહીંમાં એક મુઠ્ઠી મીઠો લીમડો મિક્સ કરીને તેની પેસ્ટ બનાવો. તમે તમારા વાળ પ્રમાણે તેની માત્રા વધારી કે ઘટાડી શકો છો. હવે આ પેસ્ટને વાળમાં સારી રીતે લગાવો અને સ્કેલ્પ પર પણ લગાવો. અડધા કલાક પછી વાળને સારી રીતે ધોઈ લો. જો તમે તેને અઠવાડિયામાં બે વાર લગાવશો તો વાળ નરમ અને સ્વસ્થ બનશે.

આહારમાં સામેલ કરોઃ- જો તમે મીઠા લીમડાને ડાયટમાં સામેલ કરશો તો મૂળ વધુ સ્વસ્થ અને મજબૂત બનશે. તેના માટે તમે તેના પાઉડરનો ઉપયોગ ભાત કે કઢીમાં કરી શકો છો. જો તમે ઈચ્છો તો તેને છાશ, ચટણી વગેરેમાં નાખીને આહારમાં સામેલ કરી શકો છો. તમે મીઠા લીમડાના પત્તાનો ઉપયોગ અન્ય ઘણી રીતે પણ કરી શકો છો. જો તમે આહારમાં કે વાળની ​​સંભાળમાં મીઠા લીમડાના પત્તાનો સમાવેશ કરશો તો તેનાથી માથાની રક્તની નસો સુધરી જશે, વાળના ફ્રિઝી થવાની સમસ્યા દૂર થશે, ડેન્ડ્રફ નહીં થાય, વાળ કાળા થશે અને બીજી ઘણી સમસ્યાઓ સરળતાથી દૂર થઈ જશે.